Quba və İsmayıllıda “Atalar Məktəbi – Məsuliyyətli Atalığa Doğru” layihəsinin növbəti mərhələsinə start verilir. Bu haqda ShimalNews 1 iyul tarixində məlumat verir.
Hər regionda 5 həftə ardıcıl davam edəcək atalar məktəblərindən gənc ata və ata olmağa hazırlaşan şəxslər faydalana biləcəklər. Layihə çərçivəsində 5-7 iyul tarixlərində aşağıdakı istiqamətlər üzrə təlimlər təşkil ediləcək:
- gender bərabərliyinin təmin olunmasında ataların rolunun əhəmiyyəti;
- gənc ata və ata olmağa hazırlaşan şəxslərin maarifləndirilməsi yolu ilə gender əsaslı cins seçimi və aidiyyəti zərərli təcrübələrlə mübarizə;
- məsuliyyətli atalığın düzgün aşılanmasını təmin etmək üçün təlim metodologiyalarının hazırlanması.
Atalar məktəblərində keçiriləcək seminarlar ailə planlanmasının sağlam cəmiyyətin formalaşdırılmasındakı rolu, sağlam ailə modeli və gender bərabərliyi prinsiplərinə əsaslanan dəyərlər, qız övladının dəyərinin təşviqi yolu ilə ailələrdə oğlan uşaqlarına verilən üstünlüyün qarşısının alınması, uşaqlara qulluq və qayğı, eləcə də digər məişət öhdəliklərinin kişi və qadın arasında bərabər bölgüsü, ataların icmalar daxilində şəbəkələşməsinin əhəmiyyəti kimi mövzuları əhatə edəcək.
Qoşulmaq üçün onlayn anketi dolduraraq qeydiyyatdan keçmək mümkündür.
