Xaçmaz rayonunun İstisu qəsəbəsində yerləşən tam orta məktəbdəki istilik problemi nəhayət ki, həll olundu!
Ötən həftə Shimal.News olaraq bu məsələni geniş işıqlandırıb, valideynlərin narahatlığını ictimaiyyətə çatdırmışdıq.
Artıq fevralın 24-dən etibarən məktəbin mərkəzləşdirilmiş istilik sistemi təbii qazla işləməyə başlayıb. Dövlət qurumlarının mütəxəssisləri tərəfindən aparılan işlər nəticəsində 320 şagird yerlik təhsil ocağının qaz xəttinə qoşulması yekunlaşıb.
Xatırladaq ki, aylarla davam edən bu problem valideynlərin haqlı narazılığına səbəb olmuşdu. Məktəbin yeni tikilmiş binasında qazlaşdırma sənədləşməsinin ləngiməsi ucbatından uşaqlar soyuq siniflərdə, papaq və gödəkçələrdə dərs keçmək məcburiyyətində qalırdılar.
Artıq uşaqlar isti siniflərdə, rahat şəraitdə təhsil almağa davam edəcəklər. Bu, bir daha sübut etdi ki, cəmiyyətin səsi eşidiləndə real dəyişikliklər baş verir!
