Xaçmaz şəhərində Vətən müharibəsi şəhidi Fərid Seyfullayevin adını daşıyan küçənin illərdir bərbad vəziyyətdə qalması narahatlıq doğurur və bir çox suallar yaradır.
Məsələ ilə bağlı Shimal.News-a müraciət edən sakinlərin sözlərinə görə, aidiyyəti qurumların bu duruma laqeyd yanaşması anlaşılmazdır. Küçə intensiv hərəkət yollarından biri olmasına baxmayaraq, nə təmir edilir, nə də təhlükəsizlik tədbirləri görülür.
Sözügedən yol ilə Xaçmaz şəhər 2 nömrəli tam orta məktəbdə təhsil alan şagirdlər də daxil olmaqla hər gün min nəfərdən artıq insan hərəkət edir. Sakinlər bildirirlər ki, yağışlı havalarda keçilməz palçıq və bataqlıq yaranır. Bundan da təhlükəlisi - küçə ərazisində elektrik transformatorunun açıq vəziyyətdə olması insan həyatı üçün real təhlükə mənbəyinə çevrilib.
"Yağış yağan kimi yaxınlıqdan keçən çay daşır, küçə sanki gölməçələrdən ibarət olur. Uşaqlar, yaşlılar bu vəziyyətdə hər gün risk altındadır", – deyə sakinlər narazılıqlarını bildirirlər.
Onların sözlərinə görə, problemin aradan qaldırılması üçün dəfələrlə aidiyyəti qurumlara müraciət edilsə də, bu günə qədər hər hansı addım atılmayıb.
Əvvəllər Bakı küçəsi kimi tanınan bu yola Vətən müharibəsində Şuşaya kimi yol keçib və şəhidlik zirvəsinə ucalan Fərid Seyfullayevin adı verilib. Onun anım mərasimlərində rayon rəhbərliyi və müxtəlif dövlət qurumlarının nümayəndələri mütəmadi iştirak etsələr də, onun adını daşıyan küçənin bu vəziyyətdə qalması ictimaiyyətdə haqlı narazılıq yaradır.
Xatırladaq ki, 29 yaşlı Fərid Seyfullayev Şuşa istiqamətində gedən döyüşlərdə şəhid olub. O, "Vətən uğrunda", "Füzulinin azad olunmasına görə" və "Şuşanın azad olunmasına görə" medalları ilə təltif edilib. Şəhid ailəli idi, Ayla və Səma adlı iki övladı Vətənə əmanət qalıb.
Shimal.News məsələni diqqətdə saxlayır. Aidiyyəti qurumların mövqeyini dərc etməyə hazırıq.
