Kənd təsərrüfatı nazirinin müavini Sarvan Cəfərov Xaçmaz, Quba, Qusar və Şabran rayonlarından olan vətəndaşlarla görüşüb.
Shimal.News xəbər verir ki, qəbul Xaçmaz Dövlət Aqrar İnkişaf Mərkəzinin inzibati binasında baş tutub.
Vətəndaşların müraciətləri əsasən işlə təminat, əkin subsidiyası, kənd təsərrüfatı təyinatlı kreditin ayrılması, dövlət qulluğuna qəbul, torpaq sahəsinin sənədləşdirilməsi və digər məsələlərlə bağlı olub. Nazir müavini Sarvan Cəfərov hər bir vətəndaşın müraciətini diqqətlə dinləyib, qaldırılan məsələlərin hərtərəfli öyrənilməsi və qanunvericiliyin tələblərinə uyğun qısa müddətdə həll edilməsi üçün müvafiq tapşırıqlar verib.
Sonra nazir müavini rayonun Çarxı kəndində intensiv şaftalı, heyva və gilas bağlarına baxış keçirib, fermerlərlə görüşüb. Görüşlərdə fermerlərlə çoxillik əkinlərə verilən birdəfəlik əkin subsidiyası, bağçılığın inkişafına dövlət dəstəyi mexanizmləri, intensiv bağçılığın genişləndirilməsi istiqamətində stimullaşdırıcı tədbirlər və digər mövzular ətrafında fikir mübadiləsi aparılıb, səsləndirilən təkliflər qeydə alınıb.
