Şəkidə fəaliyyət göstərən “Azra” şirniyyat evinin əməkdaşı Ayşən Babazadənin müştərilərə hazırladığı çay stəkanına tüpürdüyü ilə bağlı görüntülər yayılıb.
Qafqazinfo.az-ın məlumatına görə, gənc qız işinə nifrət etfiyini bildirib və törətdiyi əməli sosial şəbəkədəki hesabında paylaşıb.
İddialara görə, müştərilər çay sifariş etdikdən sonra Ayşən Babazadə stəkanlara tüpürüb, daha sonra çayı süzərək həmin şəxslərə təqdim edib.
Məsələ ilə bağlı sözügedən şirniyyat evinin rəhbəri Murad Nəsibov məsələdən xəbərdar olan kimi həmin şəxsin töhmət verilərək işdən çıxarıldığını deyib:
“Bu barədə əvvəldən məlumatımız olmayıb. Dünən polisə də izahat vermişik. Həmin xanımın özünü də polisə çağırmışdılar. Biz bu məsələni bilən kimi həmin işçini Əmək Məcəlləsinin 70-ci maddəsinin “Ç” bəndi ilə işdən çıxarmışıq. Bundan sonra o, heç yerdə işləyə bilməz. Onun müdriyyətlə dalaşması halı olmayıb. Özü izahatında deyib ki, mən öz rəfiqələrimlə orada oturmuşam, zarafat məqsədilə belə etmişəm və şəxsi səhifəmdə paylaşmışam. Dediyinə görə, həmin çay da servis olunmayıb”.
DİN-in Mətbuat xidmətindən bildirilib ki, videogörüntülərlə bağlı ərazi üzrə polis orqanında təhqiqat aparılır. Araşdırmanın nəticəsindən asılı olaraq əmələ hüquqi qiymət veriləcək.
