Şahdağ Turizm Mərkəzində yay mövsümünə hazırlıq işlərinə start verilib. Bu haqda bu gün, 28 mart tarixində Shimal.news AZƏRTAC-a istinadən xəbər verir.
Qusar rayonunda yerləşən mərkəzi bayram günləri də daxil olmaqla mart ayında 9 minə yaxın turist ziyarət edib. Dincələnlər arasında yerli turistlər çoxluq təşkil edib, lakin Yaxın Şərq, MDB ölkələri, Hindistan, Pakistan və Avropa ölkələrindən gələn qonaqlar da az olmayıb.
Mart ayında havaların isti keçməsi səbəbindən xizək zolaqlarının və qış əyləncə növlərinin fəaliyyəti dayandırılıb. Artıq ərazidə yeni mövsümə hazırlıqlar başlanılıb.
“Aparılan işlərlə yanaşı, turistlərin istirahətlərini xoş və maraqlı keçirmələri üçün ziplayn, kvadrosikl, paintbol, offroad turlar, Şahdağ koster, dağ velosipedi, hiking, bobkart və digər yay əyləncə növləri xidmət göstərir. Eyni zamanda yay mövsümünə qədər sifarişli əsaslarla piyadalar üçün 3 nömrəli kanat xətti fəaliyyətini davam etdirəcək. Yay fəslində isə 1 və 5 nömrəli qandolla xətti də əlavə olunaraq, qonaqların ixtiyarına veriləcək”, - deyə mərkəzin mətbuat katibi Orxan Bədəlov söyləyib.
