Xaçmazın Sabir küçəsində yaşayan sakinlər illərdir toz-duman ilə nəfəs almağa məcburdurlar.
Shimal.News xəbər verir ki, yerli sakinlər qonşuluqda fəaliyyət göstərən dəyirmanın onların gündəlik həyatını kabusa çevirməsi barədə sosial şəbəkələrdə paylaşımlar ediblər.
Onların sözlərinə görə, havaya qalxan un tozu evlərin damına hopur, pəncərələrdən içəri dolur, nəfəs almağı çətinləşdirir.
Vaxtaşırı təkrarlanan bu vəziyyət onların normal yaşamına mənfi təsir göstərir.
İllərdir şikayətlər var, lakin nəticə yoxdur. Sakinlər sosial şəbəkələrdə səslərini ucaltmaqla, məsələni gündəmə gətirməklə, vəziyyətin dəyişəcəyinə ümid edirlər.
Onların sözlərinə görə, dəyirman sahiblərinə dəfələrlə etiraz bildirilib, lakin hər dəfə ya vədlər verilib, ya da məsələ qulaqardına vurulub.
