Millət vəkili Qənirə Paşayeva Qusardan olan şəhid Sənan Zamanovun həyat yoldaşı ilə görüş keçirib. Bu barədə ShimalNews 25 mart tarixində Milli Məclisin Mədəniyyət komitəsinin sədrinə istinadən məlumat verir.
Tədbir Milli Məclisdə baş tutub. Silahlı Qüvvələrin mayoru Sənan Zamanovun xanımı Şəbnəm Zamanovaya bildirilib ki, şəhid ailələri ilə görüş hər kəs üçün çox əzizdir.
Daha sonra Qənirə Paşayeva şəhidin əziz ruhuna ehtiramını bildirib:
“Dəyərli bacım, hər bayramda ilk anılacaq insanlar sırasında ən öndə siz, şəhid ailələrinin üzvləri gəlirsiniz. Tanrımıza şükürlər olsun, şəhidlərimizin qanı yerdə qalmayıb, onların ruhu şaddır. Həyat yoldaşınızın şəhadət şərbəti içdiyi Suqovuşanda da, mədəniyyət paytaxtımız, Qarabağımızın yaşıl tacı Şuşada da müqəddəs bayrağımız dalğalanır. Ordumuz yetərincə güclüdür, öz üzərinə düşən vəzifələrə uyğun olaraq, istənilən tapşırığı yerinə yetirməyə qadirdir. Vətən uğrunda canını qurban vermiş igid zabitimizin timsalında bütün şəhidlərimizin ruhu qarşısında ehtiramla baş əyirik”.
Görüşdə “UNİTY-Company”in təsisçisi Fikrət Əliyev də iştirak edib. O, şəhid ailələri ilə görüşün hər bir iş adamı və vətənpərvər insan üçün mənəvi borc olduğunu vurğulayıb. Sonra şirkət adından şəhid ailəsinə hədiyyələr təqdim edilib.
Sənan Zamanov 1987-ci il avqustun 17-də Çiləgir kəndində anadan olub. Azərbaycan Respublikasının Prezidenti İlham Əliyevin Sərəncamı ilə ölümündən sonra “Rəşadət” ordeni, “Vətən uğrunda”, ”İgidliyə görə”, “Suqovuşanın azad olunmasına görə” medalları ilə təltif olunub.
