Qusar Olimpiya İdman Kompleksində jurnalistlər arasında voleybol üzrə Zəfər Kuboku keçiriləcək. Bu haqda ShimalNews 20 iyun tarixində məlumat verir.
15-16 iyul tarixlərində ümummilli lider Heydər Əliyevin 100 illik yubileyinə həsr olunmuş yarış keçiriləcək. Tədbir İdman Araşdırmalar Mərkəzi və Azərbaycan İdman Jurnalistləri İctimai Birliyinin təşkilatçılığı, "Avrora Qrup"un baş sponsorluğu və Azərbaycan Voleybol Federasiyasının dəstəyi ilə gerçəkləşəcək.
Kubokun hər birində 6 oyunçu olmaqla, ümumilikdə 6 komanda qatılacaq. Onların adları işğaldan azad olunmuş rayon və şəhərlərdən ibarət olacaq. Bütün oyunçular baş sponsor tərəfindən formalarla təmin olunacaqlar.
İyulun 15-də qrup oyunları keçiriləcək. İlk 2 yeri tutan komandalar ertəsi gün çarpaz üsulla yarımfinalda üz-üzə gələcəklər. Yarımfinal cütlərinin qalibləri finala, məğlublar isə 3-cü yer uğrunda görüşə çıxacaqlar.
İlk 3 yerin sahibinə müvafiq olaraq, qızıl, gümüş və bürünc medallar, qalibə isə Zəfər Kuboku təqdim ediləcək. Püşkatma mərasimi iyulun 7-də Bakıda baş tutacaq.
