Qusar rayonu Köhnə Xudat və Əvəcük kəndlərində deputatlığa namizəd olan Rəşad Aslanov seçicilərə öz platformasından danışıb. Bu haqda ShimalNews 13 avqust tarixində məlumat verir.
Ehtiyatda olan polkovnik Rəşad Aslanov Qusarda doğulub. Bakı Ali Hərbi Məktəb qırmızı diplomla bitirib. O, Xüsusi Təyinatlı Qüvvələrin hərbi hissəsinin komandiri olub. Xidmətlərinə görə o, “Qarabağ” ordeni, “Şuşanın azad olunmasına görə”, “Xocavəndin azad olunmasına görə”, “Füzulinin azad olunmasına görə”, “Vətən müharibəsi iştirakçısı” medalları ilə təltif olunub.
Görüşdə sakinlər öz qayğılarından danışıblar. Qeydlər aparan namizəd, aidiyyəti qurumlara müraciət edəcəyini bildirib. Eləcə də polkovnik gənclərimizə öz tövsiyələrini əsirgəməyəcəyini, narkomaniyaya qarşı ciddi mübarizə aparacağını açıqlayıb.
Hazırda 2024-cü il sentyabrın 1-nə təyin edilmiş Azərbaycan Respublikasının Milli Məclisinə növbədənkənar seçkilərdə təşviqat davam edir.
