Qusar Rayon İcra Hakimiyyətinin (RİH) başçısı Sahir Məmmədxanov rayonunun mərkəzi bazarında olub, sakinlərlə görüşüb, onları narahat edən məsələlərlə maraqlanıb.
Shimal.News RİH-ə istinadən bildrir ki, rayon rəhbəri bazarda yaradılan şəraitlə yaxından tanış olub, satılan məhsulun keyfiyyəti və qiymətləri ilə maraqlanıb.
Alıcılarla söhbət zamanı məlum olub ki, alıcılar məhsulların qiymətlərinin bahalığından, süni qiymət artımından narazıdırlar. Kənd təsərrüfatı məhsullarının istehsalı artıb. Belə olan halda qiymətlər aşağı düşməkdənsə, qalxıb.
Satıcılar isə bazarda onlar üçün əlverişli şəraitin yaradılmaması, məhsullar üçün yetərli sayda piştaxtaların olmaması, sənaye mallarının bazara pulsuz buraxılmamasından şikayətlərini bildiriblər.
Ticarət mərkəzində təmizliyin qaydasında olmaması isə hər iki tərəfi narahat edən məqamdır. Məişət tullantılarının vaxtında daşınmaması, ət dükanlarının sanitar gigiyenik qaydalara uyğun olmaması, məhsulların yağışlı havalarda belə, üstü açıq şəkildə satılması antisanitariya vəziyyətinin yaranmasına gətirib çıxarır.
İcra başçı tərəfindən 1 həftə əvvəl bazar rəhbərliyinə sadalanan problemlərin həlli üçün təkliflər verilsə belə, vəziyyət dəyişməz olaraq qalıb.
Eləcə də bazarda su problemini həll etmək üçün müvafiq qurumlara üç bulağın çəkilməsi üçün tapşırıqlar verilib.
