Qusarda 1918-ci ilin soyqırım qurbanlarının xatirəsi anılıb. Bu haqda ShimalNews 31 mart tarixində Bizim.Media-ya istinadən məlumat verir.
Mərasim günahsız insanların xatirəsinə salınmış abidənin ziyarəti ilə başlayıb. O, Quba rayonunun Digah kəndi ərazisindəki Qanlı dərədə erməni yaraqlıları ilə qeyri-bərabər döyüşlərdə həlak olanların xatirəsinə ucaldılıb.
Tədbirdə Qusar İH başçısı Şair Alxasov, hüquq-mühafizə orqanlarının rəhbərləri, ictimaiyyət , şəhid ailələrinin nümayəndələri iştirak ediblər. Daha sonra onlar Qusar şəhərindəki Rəsm qalereyasında mövzu ilə bağlı sərgi ilə tanış olublar.
İcra başçısı Şair Alxasov hadisədən danışıb. O bildirib ki, 1918-ci ildə ermənilər Quba şəhərindən sonra Qanlı dərəyə (indi Givi deyilən ərazi) yaxınlaşarkən yerli sakinlərin ciddi müqaviməti ilə qarşılaşıb:
"Bu zaman qubalıların köməyinə Qusar nahiyəsindən də yüzlərlə insan gəlib. Nəticədə silahlı ermənilərlə döyüşdə minlərlə əliyalın Quba və Qusar sakini həlak olub. Onlar əliyalın olsalar da, həyatlarından keçərək erməni yaraqlılarının irəliləməsinə imkan verməyiblər".
