Bu gündən etibarən "Tac Mahal" kimi tanınan Qusar rayonunun Hil kənd məscidi əsaslı təmir işləri ilə əlaqədar fəaliyyətini dayandırıb.
Shimal.News-un əldə etdiyi məlumata görə, 122 yaşı olan ibadət ocağında istilik sistemi, su təchizatı və digər zəruri infrastruktur yenilənəcək, mövcud şərait yaxşılaşdırılacaq.
Bildirilir ki, bir müddət öncə Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyeva Qusara səfəri zamanı Hil kənd məscidində olmuş və burada mövcud vəziyyətlə yerində tanış olub.
Qeyd edək ki, məscid 2013-cü ildə yararsız vəziyyətə düşdüyü üçün fəaliyyətini müvəqqəti dayandırmışdı. Yerli sakinlərin sözlərinə görə, 2013-cü ilədək ibadət ocağı sonuncu dəfə ötən əsrin 70-ci illərində əsaslı şəkildə təmir olunub. Məscid 2019-cu ildə isə əslən bu kənddən olan və Ukraynada yaşayan bir biznesmenin maddi dəstəyi ilə yenidən bərpa edilib.
Qusar rayon mərkəzindən 17 kilometr məsafədə yerləşən Hil kənd məscidinin tikintisinə 1904-cü ildə (bəzi mənbələrə görə 1908-ci ildə) başlanılıb, 1912-ci ildə isə inşa işləri tamamlanıb. İkimərtəbəli məscid xarici görkəminə görə Hindistanın Aqra şəhərində yerləşən və dünyanın yeni yeddi möcüzəsindən biri sayılan məşhur Tac Mahal məqbərəsinə bənzədilir.
