Qusar rayon prokuroru Elxan Əbdürrəhimov və prokurorluğunun əməkdaşları İkinci Qarabağ müharibəsi iştirakçısı, qazi İlkin Elxan oğlu Abıyevlə onun evində görüşüblər.
“Etikxeber.az”ın məlumatına görə, görüş zamanı Atluxan kəndində yaşayan qazi İlkin Abıyev keçdiyi döyüş yolundan danışarkən, Şuşa şəhəri ətrafında gedən döyüşlərdə gözləmədiyi halda qəflətən minaya düşdüyünü və sol qolunu itirdiyini bildirib.
O, həmin anı belə xatırlayıb:
“Şuşa şəhəri ətrafında döyüşlərdə qəflətən minaya düşdüm, həmin an sol qolumun hara düşdüyünü tapa bilmədik. Döyüşçü yoldaşlarım dərhal mənə ilkin tibbi yardım göstərərək qanaxma olmaması üçün qolumun qopan yerindən sarımağa başladılar. Mən isə dedim ki, heç olmasa, qopub düşən qolumu tapın, biləyimdəki o saatı açın, qolum heç oldu, heç olmasa, saatı açın götürün. Saatı min cür əziyyətlə almışam, həmin saatı müharibədən bir neçə ay əvvəl Türkiyə Cümhuriyyətində xidməti təlimdə olarkən puluma qənaət edib almışdım. Lakin nə qolumu, nə də saatı tapa bilmədik”.
Bundan sonra prokuror Elxan Əbdürrəhimov öz saatını qolundan açaraq İlkin Abıyevə hədiyyə edib.
