Quba rayon sakini sevdiyi işi gəlir mənbəyinə çevirib. Bu haqda ShimalNews 1 dekabr tarixində Azərtac-a istinadən məlumat verir.
1-ci Nügədi kəndində yaşayan 38 yaşlı Etibar Qəhrəmanov əl işlərini Günəşli kəndində, Bakı-Quba yolunun kənarında satır. Burada toplanan çox sayda quş və heyvanların heykəlləri zooparkı xatırladır. Onları hazırlamaq üçün sement, boya və metal çubuqlardan istifadə olunur.
Yalnız alış-veriş məqsədilə deyil, həm də əl işlərinə baxıb zövq almaq, şəkil çəkmək istəyənlər də avtomobillərini burada saxlayırlar. Dekorativ bəzək əşyaların qiymətləri 5-600 manat civarında dəyişir.
Qubalı sənətkar əsas gəlirini landşaft dizaynı xidmətindən əldə edir. Sifarişlər parklar, mehmanxanalar, istirahət mərkəzləri və fərdi evlər üçün yerinə yetirilir. Bura kiçik arxitektura formalı şəlalələr, heykəllər, söhbətgahlar və sairə daxildir.
Etibar Qəhrəmanov uşaq yaşlarından rəssamlığa böyük maraq göstərsə də, bu sahədə təhsil almayıb. O, heykəltaraşlıqla məşğul olaraq son 2 il abstrakt janrda əl işləri hazırlamağa başlayıb.
Sənətkar çaylarda sel sularının gətirdiyi ağac köklərinə ikinci həyat bəxş edir, onlardan abstrakt janrda heykəllər hazırlayır. O, xam materialı Quba rayonu ərazisindən keçən çaylardan gəzərək toplayır. Bəzən çayboyu ağac kökləri axtarışında kilometrlərlə məsafə qət edilir. Etibarın, hətta Xəzər dənizinin sahilinədək gedib çıxdığı olur.
[caption id="attachment_32003" align="alignnone" width="640"]
foto Azərtac[/caption]
