Qubada yazıçı-dramaturq Əmir Pəhləvanla görüş keçirilib. Bu barədə ShimalNews 15 avqust tarixində AZƏRTAC-a istinadən məlumat verir.
Tədbir “Azərkitab” Kitab Mərkəzinin Quba filialında baş tutub. Mərasim iştirakçılarına Pəhləvanın müasir Azərbaycan ədəbiyyatının və kino sənətinin görkəmli nümayəndəsi kimi qazandığı ədəbi uğurlar haqda məlumat verilib.
Əmir Pəhləvan Azərbaycan radiosunun Cənub verilişləri redaksiyasında, “Baku”, “Bakı”, "Azərbaycan müəllimi" qəzetində çalışıb və "İlham" qəzetinin təsisçisi və baş redaktoru olub. Yazıçı-dramaturqun 30 kitabı Azərbaycanda, 20 kitabı Ukraynada, 7 kitabı postsovet respublikalarında, 15 kitabı isə Avropa ölkələrində və Amerikada çap olunub.
O, "Fransız", "Qarabağ şikəstəsi", "Spasibo", "Qız qalası" bədii filmlərinin, "Bakı nefti və Nobellər", "Avtoritet", "Göyçay yəhudiləri", "Doqquzuncu oğuz uyğurları", "Kurqanlar", "Hunqoriya", “Şəhriyar”, “Sivilizasiya beşiyi - Çin”, “Tahirə” və başqa sənədli ekran əsərlərinin müəllifi və rejissorudur.
Sonda Qazaxıstan və Qırğızıstan respublikalarının, Şimali Kipr Türk Respublikası dövlət mükafatlarının laureatı olan Pəhləvan görüş iştirakçılarını maraqlandıran sualları cavablandırıb.
