Qubada Xalq yazıçısı Hüseyn Abbaszadənin xatirəsinə “Sovet ədəbiyyatımızın sonuncu generalı” adlı tədbir keçirilib. Bu barədə ShimalNews 7 dekabr tarixində Xaçmaz Regional Mədəniyyət İdarəsinə istinadən məlumat verir.
Yazıçının 100 illiyinə həsr olunan tədbir Tələt Mikayılov adına şəhər 5 saylı tam orta məktəbində baş tutub. Burada Mərkəzi kitabxananın əməkdaşları, müəllim və şagirdlər iştirak ediblər.
Bildirilib ki, Hüseyn Abbaszadə ədəbi fəaliyyətə Böyük Vətən Müharibəsi illərində cəbhə qəzetlərində çap etdirdiyi şeirləri ilə başlayıb. O, “Pioner”, “Azərbaycan”, “Göyərçin” jurnalı, “Ədəbiyyat və incəsənət” qəzetlərində rəhbər vəzifələrdə çalışıb və rus ədəbiyyatından bədii tərcümələr edib.
Abbaszadə nəşr sahəsində olduqca ciddi ədəbi nümunələr, ədəbiyyat aləmində hadisəyə çevrilən əsərlər yaratmışdır. Onların arasında 2 dəfə Sovet İttifaqı Qəhrəmanı olan general-mayor Həzi Aslanovun döyüş yolundan bəhs edən “General” romanı var.
Tədbirin sonunda Hüseyn Abbaszadənin həyat və yaradıcılığına həsr olunmuş videoçarx izlənilib, “Hüseyn Abbaszadə - 100” adlı sərgi nümayiş olunub.
