Qubada 7 il əvvəl qətl törətməkdə təqsirləndirilən Osman Ömərov və Əflatun Əspəndiyevin cinayət işi üzrə məhkəmə istintaqı yekunlaşıb.
"Unikal"ın məlumatına görə, bu barədə qərar Sumqayıt Ağır Cinayətlər Məhkəməsinin hakimi Hafiz Əliyevin sədrliyi ilə keçirilən prosesdə elan edilib.
Dövlət ittihamçısı Orxan Rüstəmov məhkəməyə Osman Ömərovun ömürlük, Əflatun Əspəndiyevin isə 20 il müddətinə azadlıqdan məhrum edilməsini təklif edib.
Vəkil müdafiə çıxışı etdikdən sonra təqsirləndirilən şəxslər son söz deyiblər.
Məhkəmə müşavirəyə gedib qayıtdıqdan sonra hökmü elan edib.
Hökmə əsasən, Osman Ömərov ömürlük, Əflatun Əspəndiyev 18 il 6 ay isə müddətinə azadlıqdan məhrum ediliblər.
Hadisə 2017-ci ildə Quba rayonunun Küpçalqışlaq kəndi ərazisində baş verib. Qudyalçay körpüsünün altında “VAZ 2106” markalı avtomobilin və onun daxilində yanan meyitlər aşkar olunub. Meyitlərin Xaçmaz rayon sakinləri - 1984-cü il təvəllüdlü Rəhman İşıqov və 1998-ci il təvəllüdlü Ülviyyə Məmmədovaya məxsus olduqları müəyyən edilib. Bu cinayətin üstü 5 ildən sonra 19 may 2022-ci ildə açılıb.
