Hamilə qadın Qubada xəstəxananın sanitar qovşağında uşaq dünyaya gətirib.
Shimal.News xəbər verir ki, hadisə Quba rayon Mərkəzi Xəstəxanasında yaşanıb.
Xaçmaz rayonunun Qusarçay kənd sakini, Konux Turanə Mustafa qızı xəstəxananın sanitar qovşağında övladını dünyaya gətirib.
Müayinə zamanı o sanitar qovşağa getmək istəyib. Oradan uzun müddət qalmasında narahat olan tibbi personal sanitar qovşağa daxil olanda qadının övladını dünyaya gətirdiyinə şahid olublar.
Məsələ ilə bağlı TƏBİB-dən açıqlama əldə olunub:
“26.02.2025-ci il tarixində saat 07:20 radələrində Quba Rayon Mərkəzi Xəstəxanasının Təcili və təxirəsalınmaz tibbi yardım şöbəsinə böyrək sancısı şikayətləri ilə hospitalizasiya olunan 1991-ci il təvəllüdlü qadın müayinə edilib.
Həmin şöbənin həkimi tərəfindən aparılan ilkin tibbi qiymətləndirmə zamanı pasiyentin hamilə olduğu müəyyən edilib və dərhal ginekoloq konsultasiyası təmin olunub.
Şöbədə aparılan təxirəsalınmaz tibbi müdaxilə nəticəsində doğuş baş verib. Neonatal reanimasiya tədbirləri yerinə yetirildikdən sonra ana və körpəsi Quba Regional Perinatal Mərkəzə təxliyə edilib.
Hamilə qadının vəziyyəti stabil olaraq qiymətləndirilib və müalicəsi davam etdirilir.
Yenidoğulmuşun vəziyyəti isə ağır olaraq dəyərləndirildiyindən süni ventilyasiya aparatına qoşulub.
Hazırda ana və yeni doğulmuşun vəziyyəti tibb müəssisəsində nəzarət altında saxlanılır”.
