Qarşıdan gələn polis işçilərinin peşə bayramı günü münasibətilə Qubada tədbir keçirilib. Bu barədə ShimalNews 30 iyun tarixində RİH-yə istinadən məlumat verir.
1998-ci il iyulun 2-sindən etibarən Prezident Heydər Əliyevin Fərmanı ilə Azərbaycan daxili işlər orqanları əməkdaşlarının peşə bayramı qeyd olunur.
Quba Rayon İcra Hakimiyyəti başçısının səlahiyyətlərini müvəqqəti icra edən başçının birinci müavini Tariyel İbrahimov və qurumun məsul şəxsləri, rayonun hüquq-mühafizə orqanlarının rəhbərləri və polis əməkdaşları tərəfindən ulu öndər Heydər Əliyevin Quba şəhərində adını daşıyan Mədəniyyət və İstirahət Parkındakı abidəsi ziyarət olunub, eyni zamanda gülqoyma mərasimi keçirilib.
Azərbaycanın ilk polis bölüyü 1918-ci il iyulun 2-də Azərbaycan Xalq Cümhuriyyəti dövründə cinayətkarlıqla mübarizə aparmaq və ictimai təhlükəsizliyi təmin etmək məqsədilə yaradılıb.
1920-ci ilin aprelində bolşevik Rusiyası ölkəmizi işğal edir və Azərbaycanda sovet hakimiyyəti qurulur. Sovet Azərbaycanının ilk daxili işlər naziri Həmid Sultanov təyin edilir. Pristavlar komissarlarla əvəzlənir, polisin adı dəyişdirilərək milis adlandırılır.
