Qubada çay yataqları zibil poliqonuna çevrilir. Bu haqda ShimalNews 11 iyul tarixində AzTV-yə istinadən məlumat verir.
Qubanın sərin meşələri, axar çayları, soyuq bulaqları da daxil olmaqla gözəl təbiəti göz oxşayır. Lakin Çağacıq çayının kənarında vətəndaşlar tərəfindən atılan müxtəlif çeşiddə tullantılara rast gəlmək olur.
Rayonumuzun ərazisindən 10-a yaxın dağ çayı keçir. Onların, demək olar ki, hamısının sahilləri zibillə doludur. Sel gələndə isə bütün bu natəmizliyi Xəzər dənizinə aparıb tökür.
Məsələ ilə bağlı Alekseyevka kənd bələdiyyəsinə müraciət olunub:
“Çayın qırağında zibilliklər vaxtaşırı tərəfimizdən təmizlənir. Lakin vətəndaşlar, əsasən, gecə vaxtları gətirib bura zibil boşaldırlar. Bu gün təmizləyirik, səhər gəlib baxırıq, yenə həmin ərazidə zibil var. Bütün bunlara baxmayaraq, biz təmizlik işləri aparırıq. Maarifləndirmə işləri də aparılır. Həmin ərazidə olan ziyalılarla, vətəndaşlarla söhbət aparılır”, - deyə bələdiyyə sədrinin müavini Behbud Məmmədov bildirib.
Bu işdə sakinlərin şəxsi məsuliyyəti vacibdir. Ekoloji mühitlə bağlı qarşıya qoyulan hədəfə çatmaq üçün isə müntəzəm tədbirlər görülməlidir ki, məsuliyyətsizlik kompensasiya olunsun.
