Azərbaycan Respublikasının gənclər və idman nazirinin müavini İndira Hacıyeva bölgəmizin gəncləri ilə görüşüb. Bu haqda ShimalNews 29 iyun tarixində məlumat verir.
Tədbir Quba Olimpiya İdman Kompleksində - açıq havada baş tutub. Burada, eləcə də Quba-Xaçmaz Regional Gənclər və İdman İdarəsinin (RGİİ) rəisi Nəcəf Novruzov, Quba Olimpiya İdman Kompleksinin direktoru Cavid Seyidov, Azərbaycan Respublikası Gənclər və İdman Nazirliyinin sektor müdiri Elnur Abdullayev, Azərbaycan Skautlar Assosiasiyasının Xaçmaz rayonu üzrə İctimaiyyətlə Əlaqələr Departamentinin rəhbəri Vəfa Musayeva, startap ölkə qalibi, Xaçmaz rayon gənci Həmid Kazımov, yaradıcı, istedadlı rəssam gənclər və könüllülər iştirak ediblər.
İlk öncə nazir müavini istedadlı gənclərin çəkdikləri rəsm əsərlərinə, həmçinin skautlarin fəaliyyəti ilə bölməyə baxış keçirib. Görüş zamanı səmimi söhbət aparılmış, gələcək planlar müzakirə edilmiş, regionun ictimai-siyasi həyatında gənclərin geniş fəallığından danışılmış, gənclərin problem və təklifləri dinlənilmiş, maraqlandıran suallar cavablandırılmışdır.
Sonda “Yaşıl dünya naminə həmrəylik ili” çərçivəsində rəsm çəkmiş yaradıcı, istedadlı gənclər fəxri fərmanlarla təltif ediliblər.
