Bu gün şəhid Ürfan Məmmədovun mövlud günüdür. Yaşasaydı, 29 yaşı tamam olacaqdı.
Ürfan Məmmədov 1994-cü il iyunun 28-i Quba rayonunun Çartəpə kəndində şəhid ailəsində dünyaya göz açıb. O, 2011-ci ilin iyul ayından 2013-cü ilin yanvar ayınadək müddətli həqiqi hərbi xidmətdə olub. Bu dövrdə Xüsusi Təyinatlı Qüvvələrin kurslarına yazılıb, lakin bəzi səbəblərdən xidmətini davam etdirə bilməyib. 2017-ci ilin may ayında gizirlik kursuna yazılıb. 1 ay kurs keçərək imtahanı uğurla verdikdən sonra Hərbi Xidmətinə Mingəçevir N saylı hərbi hissəsində gizir kimi davam edib.
Vətən müharibəsinin ilk günündən bu döyüşlərdə iştirak edib. 28 sentyabr saat 15:00 radələrində Talış kəndində düşmən postunda yemək yeyərkən döyüş yoldaşları ilə birlikdə düşmənin pusqusuna düşüblər. Kürəyindən aldığı qəlpə yarasına baxmayaraq, bir neçə saat qəhrəmancasına döyüşüb. Döyüş yoldaşından sursat almaq istəyən zaman düşmən snayperinə tuş gələrək şəhidlik zirvəsinə ucalıb. Sentyabr ayının 30-da yaşadığı Quba rayonunun Çartəpə kəndində dəfn olunub.
Ürfan Məmmədov ölümündən sonra "Vətən uğrunda" medalı ilə təltif edilib.
