Bu gün Quba Rayon İcra Hakimiyyətində son 5 il ərzində görülmüş işlər və qarşıda duran vəzifələrə həsr olunmuş hesabat yığıncağı keçirilib. Bu barədə ShimalNews 2 dekabr tarixində adıçəkilən quruma istinadən məlumat verir.
Tədbirdə Quba Rayon İcra Hakimiyyətinin başçısı cənab Ziyəddin Əliyev, Azərbaycan Respublikasının Milli Məclisinin deputatı Vahid Əhmədov, YAP Quba rayon təşkilatının sədri, Rayon İcra Hakimiyyətinin məsul şəxsləri, rayonun hüquq-mühafizə orqanlarının rəhbərləri, rayon ictimaiyyətinin nümayəndələri, şəhid ailələri və qazilər iştirak ediblər.
Yığıncaqdan əvvəl ulu öndər Heydər Əliyevin abidəsi və rayonun Şəhidlər xiyabanı ziyarət olunub.
İcra başçısı Ziyəddin Əliyev çıxış zamanı bu dövrdə yol-nəqliyyat infrastrukturunun yaxşılaşdırılması, yeni yolların çəkilməsi, məktəb tikintisi, genişmiqyaslı abadlıq işlərinin aparılması, yaşayış məntəqələrinin mavi yanacaqla təmin olunması, elektrik enerjisi ilə təminat sahəsində görülmüş işlərə və digər məsələlərə toxunub.
Sonra millət vəkili Vahid Əhmədov və yığıncaq iştirakçıları çıxış ediblər. Onlar görülmüş işlərə görə razılıqlarını bildirib və qarşıda duran vəzifələrlə bağlı təkliflərini səsləndiriblər.
Daha sonra görülmüş işlərə həsr olunmuş “5 ilin uğurları” adlı film izlənilib.
