Kənd təsərrüfatı naziri Məcnun Məmmədov Qubada vətəndaşları qəbul edib. Bu haqda ShimalNews 21 iyul tarixində quruma istinadən məlumat verir.
Nazirliyin idarə və tabeli qurumlarının rəhbərlərinin iştirakı ilə keçirilən görüş Quba Dövlət Aqrar İnkişaf Mərkəzinin inzibati binasında təşkil edilib. Qəbulda Quba, Qusar və digər rayonlardan olan vətəndaşların səsləndirdikləri müraciətlərin əsas hissəsi fermerlərə subsidiya, güzəştli şərtlərlə kreditlərin verilməsi, kənd təsərrüfatı texnikası və təsərrüfat suyu ilə təminat, ixtisasa uyğun işlə təmin edilmə, sığorta hadisəsi zamanı dəymiş ziyanın ödənilməsi və digər məsələlərlə bağlı olub.
Vətəndaşların müraciətlərinin bir qismi yerindəcə həllini tapıb. Nazirliyin fəaliyyət dairəsinə aid olmayan məsələlər isə müvafiq qurumlara çatdırılmaq üçün qeydiyyata alınıb.
Nazir, həmçinin Aqrar Xidmətlər Agentliyinin Səyyar Xidmət Qrupu mexanizatorlar üçün səyyar xidmətin təşkili prosesi ilə maraqlanıb, mexanizatorların müraciətlərini dinləyib, lazımi tövsiyələrini verib.
