Quba rayonunun Bostankeş kəndində sel təhlükəsi yaranıb. Bu barədə ShimalNews 16 iyun tarixində “Azərtac”a istinadən məlumat verir.
İyunun 15-i axşam saatlarından başlayan güclü leysan nəticəsində sel sular əmələ gəlib. Xınalıq inzibati ərazi dairəsinə aid olan Bostankeş kəndinin yollarını və həyətlərini su basıb.
Kəndin aşağı hissəsində yaşayan sakinlər evlərini tərk edərək, daha yüksəkdə yerləşən təhlükəsiz əraziyə qalxıblar.
Bostankeşdən Xınalıq kəndinə gedən yolda isə hərəkət məhdudlaşıb. Həmin yolda avtomobildə çətin vəziyyətdə qalan sakinlərin köməyinə Quba 5 saylı Yol İstismarı MMC-nin növbətçi briqadası gəlib.
Avtomobili ərazidən çıxarmaq mümkün olmasa da, vətəndaşlar Bostankeş kəndinə gətiriliblər.
