Xaçmaz rayonunda sevgilisinin anasını qəsdən öldürən şəxsə hökm oxunub. Bu haqda ShimalNews 24 iyul tarixində 7Times.az-a istinadən məlumat verir.
Hadisə rayonun Şimali kəndində baş verib. Samir Hacıəliyev 2014-cü ildə tanış olduğu Yalama kənd sakini Şəfanə Feyzullayeva ilə ailə qurmaq istəyib. Tez-tez qızın evinə qonaq gedən gənclə qızın anası Gülnaz yaxınlıq etməyə çalışıb.
“Mən onlara gedib-gəlməyə başladım. Qızın nənəsi məni çox istəyirdi. Qızın anası aramızı vurdu və sonradan bildim ki, Gülnaz məni sevir, ona dedim ki, məndən əl çək, ayıbdır. Məndən əl çəkmirdi, maşın tutaraq arxamca gəzirdi. Dostlarımın yanında məni sevdiyini deyirdi. Deyirdi ki, məni sevməsən, qızımı öldürəcəm”.
Günlərin bir günü Samir gələrkən evdə tək olan Gülnaz onun sərxoşluğundan istifadə edib və onunla cinsi əlaqədə olub. Bir müddət davam edən münasibəti kəsmək istəyən Samir qadından uzaqlaşmağa çalışıb. Lakin acığa düşən Gülnaz qızına onların intim münasibətindən danışıb.
Martın 26-da Samir qardaşının evində Gülnaz Sultanova ilə görüşüb və spirtli içki qəbul ediblər. Bu görüşdən sonra o, qadını öldürmək qərarını alıb. Bu niyyətlə Gülnazı anası Simnarə Hacıəliyeva ilə görüşdürəcəyi bəhanəsi ilə yaşadığı evə dəvət edib.
Qadını qapıda qarşılayan Samir baltanı götürərək arxadan Gülnaz Sultanovaya yaxınlaşıb və onun baş və bədən nahiyələrinə 5 zərbə endirib. Qadının hərəkətsiz qaldığını görərək onun öldüyünü güman edib və Yalama polis bölməsinə gələrək həyətində adam öldürdüyünü bildirib. Mərkəzi Rayon Xəstəxanasına çatdırılan qadın hadisədən 5 gün sonra dünyasını dəyişib.
Məhkəmə prosesi zamanı Samir Hacıəliyev özünü qismən təqsirli bilib. O, məhkəmənin hökmü ilə 10 il 6 ay müddətinə azadlıqdan məhrum edilib.
