Xalqımız qış fəslini xalq təqviminə uyğun olaraq, "çillə" adı ilə üç yerə bölüb. Böyük çillə 40 gün (21 dekabr - 30 yanvar), Kiçik çillə 20 gün (31 yanvar - 20 fevral), ala çillə və ya ala çolpav ("Boz ay" da deyilir) isə bir ay (20 fevral - 20 mart) olur.
Ölkəmizdə qış nə qədər sərt keçsə də, insanlar tarix boyu onun gəlişini bayram kimi qarşılayıb, müxtəlif ayin və mərasimlərlə yola salıblar.
Şəkidəki "Narınqala" Folklor evinin kollektivi də bu ənənəni yaşadaraq Böyük çilləni yola salıb, Kiçik çilləni qarşılayıblar.
Keçmişdə qış ayları əyləncələr, aşıq məclisləri və qadınların toxuculuq işləri ilə yadda qalardı. Adətən, insanlar yay və payızdan qalan yorğunluqlarını qışda çıxarar, təsərrüfat işlərinin azlığından istifadə edərək, istirahətə daha çox vaxt ayırardılar. Bir sözlə, Böyük və Kiçik çillə onlar üçün bir növ əyləncə dövrü idi.
Yanvarın 30-dan 31-nə keçən gecə Böyük çillə yerini Kiçik çilləyə təslim edir. Şəkidə bu keçidlə bağlı müxtəlif əfsanələr və bayatılar hələ də yaşamaqdadır.
Adətən Böyük çillədən fərqli olaraq, Kiçik çillə dövründə daha kəskin soyuqlar müşahidə edilir, sərt şaxtalar olur. Ona görə də Kiçik çilləyə qışın "oğlan çağı" da deyirlər.
Azərbaycanın bəzi bölgələrində Böyük çillədən Kiçik çilləyə keçəndə müəyyən mərasimlər təşkil olunur. Kiçik çillənin birinci ongünlüyündə Xıdır Nəbi bayramı qeyd edilir, qovurğa qovrulur, hədik və digər yeməklər hazırlanır.
