Şamaxı rayonunun Mirikənd kəndində qeyri-adi səbəbdən ailə münaqişəsi baş verib.
Lent.az-ın məlumatına görə, 42 yaşlı Arif Səlimov (ad və soyad şərti olaraq göstərilir) yataq otağının qapısını aça bilmədiyinə görə arvadını ağac parçası ilə döyüb.
Hadisə onların yaşadıqları evə qayıtdıqdan sonra baş verib. Arif Səlimov yataq otağının qapısını açmağın mümkün olmadığını görərək kilidi sındırıb və bundan əsəbiləşərək həyat yoldaşının qol, ayaq və kürək nahiyələrinə bir neçə zərbə vurub.
Zərərçəkənin şikayəti əsasında Arif polis tərəfindən saxlanılıb və barəsində Cinayət Məcəlləsinin 128-ci maddəsi ilə cinayət işi açılıb.
Təqsirləndirilən şəxs ifadəsində, ailənin bu il avqustun 29-da qurulduğunu bildirib. Hadisə günü əvvəlcə qayınanasıgilə, daha sonra isə "Asan Xidmət"ə getdiklərini deyib. Evə qayıtdıqdan sonra qapının açılmaması onu qəzəbləndirib və o, həyat yoldaşına əl qaldırdığını etiraf edib. O, əməlindən peşman olduğunu və zərərçəkənlə barışdıqlarını bildirib.
Zərərçəkən qadın da ərinə qarşı tələbi olmadığını, hadisənin evdən çıxarkən qapını kilidləməsi və sonra aça bilməməsi səbəbindən baş verdiyini deyib.
Şamaxı rayon Məhkəməsinin qərarı ilə cinayət işinə xitam verilib və Arif Səlimov məsuliyyətdən azad olunub.
