Xaçmazlı gənc toyuq, qaz, ördək, dəvəquşu və başqa quşların yumurtalarından istifadə etməklə bir-birindən maraqlı suvenirlər düzəldir. Suvenirlər hazırlamaq Fərmayıl Əhmədovun 12 illik hobbisidir.
Azertag.az-ın məlumatına görə, Azərbaycan Dövlət Neft və Sənaye Universitetinin məzunu olan Fərmayıl hazırda Xaçmazda elektrik mühəndisi kimi fəaliyyət göstərir. Asudə vaxtlarının böyük hissəsini isə hobbisinə ayırır.
İstedadlı gənc oyma sənətini internet vasitəsilə öyrənib. Əvvəllər həvəskar şəkildə bu işlə məşğul olan Fərmayıl sonradan əl işlərini təkmilləşdirib. Çətinliklə üzləşəndə isə internet vasitəsilə türkiyəli mütəxəssislərə məsləhətləşir. Dediyinə görə, ölkəmizdə belə suvenirləri ondan başqa hazırlayan yoxdur:
“Yumurtanın qabığı zərif olduğundan diqqətlə və səbirlə çalışmaq lazımdır. Bir suvenirin hazırlanması üçün bəzən 1 saat, bəzən isə 10 gün vaxt sərf edirəm. Kənardan baxanda sadə görünsə də, bu iş çox böyük diqqət və səbr tələb edir. Əl işləri üçün səthi daha təmiz, möhkəm qabıqlı yumurtaları seçirəm. Daha çox ördək, böyük işlər olanda isə qaz və dəvəquşu yumurtasından istifadə edirəm. Çox kiçik miniatür işlər üçün göyərçin yumurtası da istifadə etmək olar”.
Fərmayıl bu vaxta kimi yumurtadan 120-dən çox əl işi hazırlayıb. Bir ədəd sadə suvenir yumurta ABAD-a məxsus etno-butiklərdə 26 manata satılır. Böyük ölçülü və daha çox naxışlarla bəzədilən suvenir yumurtalar isə sərgilənmək üçün hazırlanır.
