Şəki Apellyasiya Məhkəməsində qəsdən sağlamlığa az ağır zərər vurmada və xuliqanlıqda təqsirləndirilən Xəyal Hüseynovun barəsindəki hökmdən verilən apellyasiya şikayətləri üzrə məhkəmə prosesi başa çatıb.
Pravda.az-ın məlumatına görə, hakim Akif Eyvazovun sədrliyi ilə keçirilən iclasda qərar elan edilib.
Qərara əsasən, apellyasiya şikayətləri qismən təmin edilib, Qax Rayon Məhkəməsinin 26 may 2025-ci il tarixli hökmü dəyişdirilib, onun 2 il 1 ay 28 gün müddətinə azadlıqdan məhrumetmə cəzası 1 il 5 ay 28 günə endirilib.
İttihama görə, hadisə 08 iyun 2024-cü il tarixdə, saat 12:30 radələrində Qax şəhərində baş verib.
Belə ki, təqsirləndirilən Xəyal Hüseynov özünə məxsus iş otağında heç bir əsaslı səbəb olmadan zərərçəkmiş Murad Səfərovla (soyadı şərtidir) mübahisə edib, nalayiq ifadələr işlədib, daha sonra xuliqanlıq niyyəti ilə ona yumruq zərbələri endirib. Bir qədər sonra o, iş otağının qarşısında yenidən hücum edərək zərərçəkmişin sifət nahiyəsinə yumruq zərbələri vurub, onu arxa yıxaraq təpiklə xəsarət yetirib.
Zərbələr nəticəsində zərərçəkmiş Murad Səfərovun burun sümüklərinin qapalı yerdəyişən sınığı, üz sümüklərinin çoxsaylı qapalı sınıqları, baş-beyin silkələnməsi və digər xəsarətlər aşkarlanıb ki, bunlar sağlamlığın uzun müddətə pozulmasına səbəb olub.
Xəyal Hüseynov məhkəmədə ifadə verərək bildirib ki, Qax rayonu ərazisində çalışdığı ofisində Zəminə (adı şərtidir) xanım ona kömək edir və hər yardımına görə 5-10 manat zəhmət haqqı alır.
Onun sözlərinə görə, 08 iyun 2024-cü il tarixdə, təxminən saat 12:30 radələrində Murad sevgilisi Zəminə xanımı görmək üçün iş yerinə daxil olub. Qız isə bunu ona qadağan edib. Muradın içəri daxil olması zamanı Xəyalla onun arasında mübahisə yaranıb.
Xəyal qeyd edib ki, təqsirləndirilən şəxs əsəbiləşərək Muradın üz nahiyəsinə bir dəfə şillə vurub. Bu zaman Murad ona yumruq və təpik atıb, həmin yumruqlardan biri təqsirləndirilənin sol göz nahiyəsinə dəyib. Hadisənin davamında Muradın atdığı təpiklər təqsirləndirilənin sağ ayaq və sağ əl nahiyəsinə dəyib, Murad isə arxa tərəfə yıxılıb.
Qax Rayon Məhkəməsinin hökmü ilə Xəyal Hüseynov 2 il 1 ay 28 gün müddətinə azadlıqdan məhrum edilib və məhkəmə zalında həbs olunub. Hökmündən narazı qalan təqsirləndirilən şəxs apellyasiya şikayəti vermişdi.
