Son vaxtlar ölkəmizin bir sıra bölgələrində Amerika ağ kəpənəyi adlandırılan ziyanverici həşəratın yayılma ocaqları müşahidə edilir.
“APA”nın məlumatına görə, şimalın Xaçmaz, Quba, Şabran, Siyəzən rayonlarında, cənub bölgəsində (Astara, Lənkəran), Abşeron yarımadası və Bakı şəhərində təhlükə mənbələri var.
"Mübarizə tədbirləri il boyu aparılmalıdır. Bu tədbirlər vaxtında və düzgün həyata keçirilərsə, ziyanvericinin sayı və sonrakı qış ehtiyatının miqdarı kəskin surətdə azalar və kəpənək kütləvi çoxalmaq imkanından məhrum olar", - deyə Tətbiqi Zoologiya Mərkəzinin aparıcı elmi işçisi, biologiya üzrə fəlsəfə doktoru, dosent İradə Nuriyeva bildirib.
Bakı Şəhər İcra Hakimiyyəti Yaşıllaşdırma Təsərrüfatı Birliyi sözügedən məsələ ilə bağlı açıqlamasında bildirilib ki, bu il temperaturun daha yüksək, yağıntının az olması ilə bağlı olaraq bu ziyanvericilərin sürətli artımı müşahidə edilir:
“Havalar soyuduqca, temperatur 10-15 dərəcəyə endikcə ziyanverici həşəratlar əlverişsiz şəraitə düşdükləri üçün məhv olurlar".
Məlumat üçün qeyd edək ki, Amerika ağ kəpənəyi - Hyphantria cunea meyvə bağları, dekorativ ağaclar və meşələr üçün ciddi təhlükə mənbəyidir. Ümumilikdə 250-dən çox ağac növünə ziyan vurmaq potensialına malikdir.Zərərvericinin ən əlverişli qidası tut, alma, armud, heyva, gavalı, gilas, qarağac, yunan qozu, palıd, üzüm və s. bitkilərin yarpaqlarıdır.
Vətəni Şimali Amerika olan bu ziyanverici düşdüyü iqlim şəraitinə tez uyğunlaşması, yüksək məhsuldarlığı, (yumurtaqoyma qabiliyyətinin yüksək olması), gizli həyat tərzi keçirməsi, ildə 2 nəsil verməsi və tırtıllarının çox yeyimcil olması ilə fərqlənir və ən təhlükəli karantin zərərvericiləri sırasına daxil edilir.
