35 yaşlı Quba rayon sakini Vüqar Səmədov (soyadı şərti) adam bıçaqladığına görə 5 il müddətinə azadlıqdan məhrum edilib. Bu haqda ShimalNews 9 iyul tarixində “Pravda.az”a istinadən xəbər verir.
Sumqayıt Ağır Cinayətlər Məhkəməsində Vüqara hökm oxunub. İttihama görə, hadisə 2023-cü il avqustun 29-dan 30-na keçən gecə Sumqayıt şəhərinin 4-cü mikrorayon ərazisində qeydə alınıb.
Vüqar əmisi qızının övladının doğum günü mərasimində iştirak edib. Süfrə arxasında yeznə barədə söhbət düşüb. Bu zaman təqsirləndirilən şəxs “yeznə” sözünün eşşəyə deyildiyini, onların zonasında, yəni Qubada isə kürəkən deyildiyini söyləyib. Bundan sonra əmisi qızının əri - iş üzrə zərərçəkmiş Elşən Kərəmov (soyadı şərti) Vüqarın ünvanına nalayiq ifadələr işlədib.
Məclisi tərk edən Vüqar həmin evə yenidən geri qayıdıb və Elşəni çölə çağıraraq söhbət eləməyə çağırıb. Artıq bayırda çantasından bıçağı çıxararaq zərərçəkmiş şəxsin qarın nahiyəsindən 1 dəfə zərbə endirib.
Hadisədən sonra V.Səmədov Qubaya qayıdıb, avqustun 30-u səhər saat 10:00 radələrində qardaşı ilə birlikdə Sumqayıt ŞPİ-nin 3-cü Polis Bölməsinə gedərək törətdiyi cinayəti etiraf edib.
