Türkiyənin İstanbul şəhərinin Sarıyer rayonunda Türk dünyasının böyük ədəbi simalarından biri, Azərbaycanın Xalq şairi Bəxtiyar Vahabzadənin barelyefi açılıb.
Shimal.News xəbər verir ki, tədbir Azərbaycan Respublikasının İstanbul Baş Konsulluğunun və Sarıyer Bələdiyyəsinin birgə təşkilatçılığı ilə həyata keçirilib.
Açılış mərasimində iki qardaş ölkənin rəsmi nümayəndələri, ictimaiyyət və media təmsilçiləri iştirak ediblər.
Açılış mərasimində çıxış edən Sarıyer Bələdiyyəsinin başçısı Oktay Aksu və Azərbaycanın İstanbul Baş konsulluğunun təmsilçiləri Bəxtiyar Vahabzadənin Türk dünyasının birliyinə, Azərbaycan və Türkiyə qardaşlığının möhkəmlənməsinə verdiyi töhfələrdən danışıblar.
Çıxış edənlər vurğulayıblar ki, şairin yaradıcılığında “Bir millət, iki dövlət” ideyası hər zaman aparıcı mövqe tutub. Bu gün Sarıyerdə ucaldılan abidə də həmin qardaşlığın, mədəni bağların və ortaq dəyərlərin rəmzidir.
Barelyef qara mərmər üzərində işlənmiş kompozisiyadan ibarətdir. Üst hissəsində şairin portreti, aşağı hissəsində isə onun məşhur misraları həkk olunub:
“Bir millətik, iki dövlət,
Eyni arzu, eyni niyyət.
Hər ikisi cümhuriyyət -
Azərbaycan - Türkiyə”.
