Artıq bir aya yaxındır ki, İsmayıllı rayonun Topçu kəndində ev quşları kütləvi şəkildə tələf olmağa başlayıb.
Bizim.Media-nın məlumatına görə, sakinlər bu vəziyyətdən çox narahatdırlar.
Rayon baytarları hadisəni havaların qeyri-sabit keçməsi ilə əlaqələndirsələr də, kütləvi tələf olmanın konkret hansı səbəbdən baş verməsi məlum deyil.
“Həmin ərazidə baş verən hadisə ilə bağlı müraciətimiz əsasında Qida Təhlükəsizliyi Agentliyinin Şamaxı Regional idarəsinin əməkdaşları rayona ezam olunub. Hadisə yerinə baxış keçirilib və ölmüş toyuqlardan nümunələr götürülüb. Laboratoriya analizlərindən sonra xəstəliyin hansı səbəbdən baş verməsi ilə əlaqədar ictimaiyyətə məlumat veriləcək”, - deyə İsmayıllı rayon Heyvan Sağlamlığı və Baytarlıq Xidmətləri idarəsinin rəisi Mahir Bayramov bildirib.
Qeyd edək ki, bu xəstəlik son günlər toyuqlarla yanaşı hind quşları arasında da yayılmağa başlayıb. Bu günədək kənddə ümumilikdə 500 başdan çox ev quşu tələf olub.
