Son günlər sosial şəbəkələrdə İsmayıllı rayonunun Qalınçaq kənd sakini Qərənfil adlı qadının videoları geniş şəkildə yayılıb.
Shimal.News məlumat verir ki, orta yaşlı qadın paylaşdığı videolarda həmkəndlilərinin bir neçəsinin adını çəkərək onlar barəsində müxtəlif iddialar səsləndirib.
Qadın bildirib ki, kənd sakinlərindən bir neçəsinə borc pul verib, lakin həmin vəsaiti geri ala bilmir. Onun sözlərinə görə, adını çəkdiyi şəxslər narkotik vasitələrdən istifadə edirlər, evindən ona məxsus əşyaları və heyvanları oğurlayıblar, hətta evini yandırmaqla hədələyiblər.
Yaxın günlərdə kənd sakinlərindən biri – Seymur Kərimov – sosial şəbəkədə yayılan iddialara cavab verərək, barəsində deyilənlərin həqiqətə uyğun olmadığını bildirib.
Sosial şəbəkə istifadəçilərinin bir qismi isə Qərənfil adlı qadının əqli məhdudiyyətli olduğunu iddia ediblər.
Videoları yüzminlərlə baxış toplayan qadının çıxışları bəzi istifadəçilər tərəfindən zarafat mövzusuna çevrilsə də, onun həyatının təhlükədə ola biləcəyi ehtimalı cəmiyyətdə narahatlıq doğurub.
Olke.az-ın məlumatına görə, məsələ ilə bağlı Daxili İşlər Nazirliyinin Şəki Regional Qrupundan bildirib ki, Qalınçaq kənd sakininin iddiaları əvvəllər araşdırılıb və təsdiqini tapmayıb.
Məlumata görə, qadının səsləndirdiyi fikirlər əsassız hesab olunub.
