İsmayıllı Rayon İcra Hakimiyyətinin veb saytını araşdırarkən maraqlı bir məsələ ilə qarşılaşdım. Bu qurum ya möhtəşəm bir təvazökarlıq nümayiş etdirir, ya da sadəcə işləməməyi sənətə çevirib.
İcra hakimiyyətinin saytında 2022-ci ildən bu tərəfə illik hesabat yoxdur. Yoxsa, İcra Hakimiyyəti öz uğurlarını o qədər böyük görür ki, artıq xalqla paylaşmağa ehtiyac duymur? Bu özgüvən haradan qaynaqlanır, doğrudan da maraqlıdır.
Saytdakı "Fəaliyyət" bölməsinə daxil olduqda əslində fəaliyyətsizliklə tanış olursan. "İsmayıllı rayonunun fəaliyyətdə olan sənaye müəssisələri" adlı hissəyə girəndə məlum olur ki, 2017-ci ildən rayon ərazisində yeni sənaye müəssisəsi yaradılmayıb. Lakin qəribədir ki, ölkə başçısı son beş ildə dəfələrlə rayonda təməlqoyma və açılış mərasimlərində iştirak edib. Görünür, həmin müəssisələr icra hakimiyyəti üçün "görünməz sənaye" sahəsinə aiddir.
Turizm obyektləri ilə bağlı bölmə isə əsl şah əsərdir. 2017-ci ildən sonra rayonda tikilən otellər və mehmanxanalar nəinki qeyd olunub, heç "var" olduqları belə xatırlanmır. Bu qədər obyektin inşa edildiyi bir rayonda “fəaliyyətdə olan turizm obyektləri” siyahısında sükut hökm sürür. Bəlkə bu obyektlər yalnız seçilmişlərin görə biləcəyi, adi gözlə görünməyən obyektlərdir? Axı bu qədər "görünməz inkişaf" heç bir rayonda olmayıb.
Kənd təsərrüfatı bölməsində də 2017-ci ildən sonra hər şey donub. Sanki rayonun kənd təsərrüfatı sahəsində inkişaf deyil, artıq tarix yazılır. Yeni müəssisələrin yaranmaması, mövcud olanların inkişafına dair məlumatların olmaması ilə yanaşı, bu sahədə əsl bir zaman tunelində ilişib qalmışıq.
Sonuncu dəfə isə 2022-ci ilin sosial-iqtisadi inkişafının yekunları və 2023-cü ildə qarşıya qoyulan məqsədlərdən danışılıb. Amma görünən odur ki, 2023-cü ildə qarşıya qoyulan məqsədlər kağız üzərində o qədər möhtəşəm olub ki, onları gerçəkləşdirməkdən qorxublar.
İcra Hakimiyyətləri üçün "mənfi fəaliyyət" termini artıq ənənə halını alıb. Amma İsmayıllıda bu termini də təkzib etmək üçün əlindən gələni edirlər – sanki "heç bir fəaliyyət göstərməmək" bir strategiyadır.
Beləliklə, İsmayıllı Rayon İcra Hakimiyyəti, siz ya həqiqətən görünməz işlər görürsünüz, ya da bu qədər özünəinamla tarixə düşmək istəyirsiniz. Lakin unutmaq lazım deyil ki, bir gün bu "görünməz irəliləyişlərə" layiqli qiyməti veriləcək.
Davud Maqsudov
