Dağlıq Şirvan Regional Təhsil İdarəsinin İsmayıllı Rayon Təhsil Sektoru üzrə tabeliyində fəaliyyət göstərən ümumi təhsil müəssisələrində “Qərbi Azərbaycana qayıdış” adlı olimpiadanın birinci mərhələsi uğurla başa çatıb. Tədbirdə rayonun müxtəlif məktəblərindən IX və X sinif şagirdləri biliklərini sınayıblar.
Shimal.News xəbər verir ki, olimpiadanın keçirilməsində əsas məqsəd məktəblilər arasında Qərbi Azərbaycanın zəngin tarixi, coğrafiyası, mədəni irsi, görkəmli şəxsiyyətləri, ədəbiyyatı, folkloru və toponimləri haqqında bilikləri artırmaq, onlarda milli kimlik və tarixi yaddaşın möhkəmləndirilməsinə töhfə verməkdir. Şagirdlərə həm fərdi, həm də komanda şəklində öz biliklərini nümayiş etdirmək imkanı yaradılıb.
Qeyd edək ki, “Qərbi Azərbaycana qayıdış” olimpiadası ümumilikdə 3 mərhələdən ibarətdir. İlk mərhələ rayon səviyyəsində keçirilir. Növbəti — yarımfinal mərhələsi may ayında ölkə üzrə zonalar üzrə baş tutacaq. Böyük final isə iyun ayında paytaxt Bakıda keçiriləcək və ölkənin müxtəlif bölgələrindən gələn ən güclü məktəbliləri bir araya gətirəcək.
Olimpiada iştirakçıları yalnız bilik yarışına qatılmaqla kifayətlənməyib, həm də Qərbi Azərbaycanın mədəni irsi ilə bağlı təqdimatlar hazırlayaraq, müxtəlif layihələrdə fəallıq göstəriblər. Təşkilatçılar bildirib ki, bu cür tədbirlər gənc nəslin tarixi biliklərini dərinləşdirməklə yanaşı, onların vətənpərvərlik ruhunda tərbiyə olunmasına da xidmət edir.
