"İsmayıllı Dövlət Peşə Təhsil Mərkəzi" publik hüquqi şəxsin direktoru Cəlil Bağırovun vətəndaşları aldadaraq 60-70 ailədən "bilet pulu" adı ilə pul topladığı iddia olunur.
Shimal.News xəbər verir ki, bununla bağlı sosial şəbəkələrdə məlumat yayılıb.
Sakinlərin bildirdiyinə görə, hər ailədən yığılan 10 manat müqabilində möhtəşəm bir şənlik keçiriləcəyi və uşaqlara hədiyyələr veriləcəyi vəd edilib. Lakin toplanan məbləğin qarşılığında deyilən miqyasda nə şənlik keçirilib, nə də uşaqlara hədiyyələr paylanıb.
Sakinlər iddia edirlər ki, hər dəfə fərqli bəhanələrlə onlardan pul tələb olunur. Bu vəziyyətin davamlı hal alması və problemlərin həll olunmaması narazılıq yaradır.
Məsələ ilə bağlı vətəndaşlar Dağlıq Şirvan Regional Təhsil İdarəsinə müraciət etdiklərini bildiriblər. Ancaq onların müraciətlərinin cavabsız qaldığını qeyd edirlər.
Hazırda məsələyə aidiyyəti qurumların münasibəti gözlənilir.
