İsmayıllı rayonunun Kürdmaşı kəndində bir aya yaxındır ki, mal-qaranın tələf olması halları artıb.
Vətəndaşların APA TV-yə verdikləri məlumata görə, baytar həkimlər heyvanlar arasında quduzluq xəstəliyi yayıldığını bildiriblər.
Kənd sakini Əlövsət Həsənov deyib ki, heyvanlara vaksin vurulub: “Mal-qarada quduzluq xəstəliyi olduğu deyilir. Bir inəyimiz ölüb. Kənddə çox adamın təsərrüfatında var”.
Sakin Teymur Ağayev də eyni xəstəlikdən üç inəyinin tələf olduğunu bildirib.
Tahir Nəcəfov da mal-qaranın öldüyünü təsdiqləyib: “Bir ay əvvəl inəyimiz əvvəlcə, su içmədi, gözləri qızarmışdı, başqa inəklərə hücum edirdi. Öz balasını boynundan dişləmişdi. Daha sonra da tələf oldu”.
İsmayıllı rayon Baytarlıq İdarəsi məsələ ilə bağlı açıqlama verməyib.
Qida Təhlükəsizliyi Agentliyindən (AQTA) isə bildirilib ki, agentliyin regional bölməsinin əməkdaşları rayon baytarlıq idarəsinin əməkdaşları ilə birgə kəndə baxış keçiriblər.
“Araşdırmalar başlanıb. Araşdırmaların nəticəsi ilə bağlı məlumat veriləcək”.
