“Mən illərdir ki, İsmayıllı rayon Heydər Əliyev adına Mədəniyyət Mərkəzində sintezator ifa edirdim. Bu ilin yanvarında isə heç bir rəsmi xəbərdarlıq olmadan işdən azad edilmişəm”.
Bu şikayətlə “Qafqazinfo”ya İsmayıllı rayon sakini, birinci qrup əlil İlham Kamil oğlu Dadaşov müraciət edib.
Onun sözlərinə görə, Mərkəzdə “Niyal” İnstrumental ansamblının tərkibində müşayiətçi vəzifəsində çalışıb. O iddia edir ki, rəsmi xəbərdarlıq olmadan daha 17 nəfərin işinə xitam verilib: “2013-cü ildən 2018-ci ilə kimi işləmişəm. Həmin vaxt da ixtisar olan zaman işdən çıxarılmışdım. Onda Əmək Məcəlləsində yazılan qanunu bilmirdim. 2022-ci ildə yenidən müraciət etdim. Nəhayət 2023-cü ilin yanvarın 1-i mədəniyyət naziri Adil Kərimlinin təqdimatı ilə İsmayıllı rayon Heydər Əliyev adına Mədəniyyət Mərkəzinə “Niyal” İnstrumental ansamblına yenidən işə bərpa olundum. 2025-ci ilin yanvarın 6-sı günü belə bir haqsızlıqla üzləşdim. Dağlıq Şirvan Regional Mədəniyyət İdarəsinin rəisi Vasif Qurbanzadə İsmayıllı rayonunda 17 nəfər vətəndaşa heç bir rəsmi xəbərdarlıq etmədən işdən azad etməklə bağlı 3 gün qalmış şifahi xəbərdarlıq edib. Hansı qanunda yazılıb ki, rəsmi xəbərdarlıq olmadan işçini işdən azad edəsən?!”
Şikayətçi deyir ki, dəfələrlə müraciət etsələr də, rəsmi heç bir cavab verilmir: “İşdən çıxarılan vətəndaşların arasında 1-ci qrup fiziki məhdudiyyətli əlil, 2 nəfər İkinci Qarabağ müharibəsi qazisi, müharibə veteranı və şəhid bacısı var. Dəfələrlə müraciət etməyimə baxmayaraq, heç bir rəsmi cavab vermirlər. Hətta dəfələrlə demişəm, ölkə başçısının sərəncamı var ki, əlilliyi olan vətəndaşlar işləmək üçün müraciət edərlərsə, onu işə qəbul etməyənlər inzibati məsuliyyətə cəlb olunaraq barələrində müvafiq tədbir görüləcək”.
İlham Dadaşov səhhətindəki problemin 2011-ci ildə yarandığını əlavə edib: “2006-cı ildə hərbi xidmət zamanı döyüş bölgəsində-Tərtərdə təlimdə yıxıldım, onurğam zədələndi. Təsirini həmin an göstərmədi. Ağrı ilə xidməti başa vurduqdan sonra, 2011-ci ildən vəziyyətim tədricən ağırlaşdı. Həmin ildən 2018-ci ilə kimi 2-ci qrup əlillik təyin edilmişdi. 2019-cu ildən isə 1-ci qrup əlillik təyin olunub. Əlil arabasında olmuşam və komissiya rəy verib ki, oturaq vəziyyətdə yüngül işlərdə işləyə bilər”.
Məsələ ilə bağlı Mədəniyyət Nazirliyinə sorğu ünvanladıq. Nazirlikdən müraciətimizə belə cavab verildi: “Təəssüflə bildiririk ki, 2025-ci ildən ştatdankənar vəzifələr üzrə əməyin ödənişi sistemində dəyişikliklər edildiyi üçün bu kateqoriyadan olan şəxslərin cari ildən əmək müqaviləsinin uzadılması qeyri-mümkündür”.
