İsmayıllı şəhəri, Təbriz küçəsində bıçaqlanma hadisəsi qeydə alınıb.
Shimal.News xəbər verir ki, Samir Ağarzayev (soyadı şərtidir) 2015-cü ildə 1991-ci il təvəllüdlü Gülnar Ağarzayeva ilə ailə qurub və birgə nikahda iki oğlu olub. Bir müddət sonra Samir evə tez-tez içkili gəlməyə başlayıb. Daha sonra isə o, günlərlə evə gəlməyib və başqa ünvanda gecələyib. Nəticədə ailədə münasibətlər daha da gərginləşib.
Bir gün Samir yorğun halda evə gəlib yatıb. O, səhər yuxudan oyananda mobil telefonunu qoyduğu yerdə tapmayıb və Gülnardan telefonunu istəyib. Gülnar isə onun telefonundan xəbərsiz olduğunu bildirib, Samir isə yenidən yatıb. Bir neçə saatdan sonra yuxudan oyanan ər yenidən mobil telefonunu axtarıb, arvadı isə telefonu ona verməyib. Nəticədə onların arasında dava düşüb. Həmin vaxt Samir həyat yoldaşını sillə ilə vurub və evdən çıxmaq istəyib. Gülnar mətbəx bıçağını götürərək onun kürək nahiyəsinə zərbə endirib. Samir bıçağı kürəyindən çıxararaq yerə atıb və İsmayıllı Rayon Mərkəzi Xəstəxanasına gedib. Hadisə yerinə polis əməkdaşları gəliblər və faktla bağlı cinayət işi başlanaraq məhkəməyə göndərilib.
İsmayıllı Rayon Məhkəməsində keçirilən prosesdə Samirə dəymiş ziyan ödənildiyindən tərəflər arasında barışıq elan olunub. Məhkəmənin qərarı ilə cinayət işinə xitam verilib və Gülnar məsuliyyətdən azad olunub.
