İsmayıllı rayon sakini Murad Süleymanlının ölümündə təqsirli bilinən və azadlıqdan məhrum olan həkim apellyasiya şikayəti verib.
"Report"un məlumatına görə, hadisə ötən ilin yanvar ayında Qəbələ rayon Mərkəzi Xəstəxanasına baş verib. Əməliyyat zamanı süni nəfəs borusu xəstənin qida borusuna salınıb. Nəticədə xəstə kəskin tənəffüs çatışmazlığı səbəbindən ölüb.
Əməliyyat 69 yaşlı həkim anestezioloq-reanimatoloq V. Babayev və digər həkimlər Telman və Azər adlı şəxslərlə birgə edilib.
V.Babayev barəsində Cinayət Məcəlləsinin 314.2-ci (səhlənkarlıq, ehtiyatsızlıqdan zərərçəkmiş şəxsin ölümünə səbəb olduqda) maddəsi ilə ittiham verilib.
Qəbələ Rayon Məhkəməsinin hökmü V. Babayev üç il müddətinə azadlıqdan məhrum edilib. Hökmdə qeyd edilib ki, müttəhim cəzasını məntəqə tipli cəzaçəkmə müəssisəsində çəkəcək.
V.Babayev həmçinin iki il müddətinə həkim-anestezioloq-reanimatoloq vəzifəsində işləmək hüququndan məhrum edilib. Məhkəmənin hökmündən müdafiə tərəfi şikayət verib.
Şəki Apellyasiya Məhkəməsində keçirilən prosesdə apellyasiya şikayəti təmin edilməyib.
