İsmayıllıda şəhidin xatirəsinə həsr olunmuş “Qəhrəmanın şəhadəti” adlı kitabın təqdimatı keçirilib. Bu haqda ShimalNews 7 may tarixində məlumat verir.
Tədbir 44 günlük Vətən müharibəsi şəhidi gizir Ramil Musayevin təhsil aldığı N. Behdiyev adına 6 saylı tam orta məktəbdə təşkil edilib. Mərasimdə RİH başçısı Nahid Bağırov, RİH-nin əməkdaşları, YAP İsmayıllı Rayon Təşkilatının sədri, şəhid ailələri, qazilər, ictimaiyyət nümayəndələri, şəhidin ailə üzvləri, şəhidin sinif və kursant yoldaşları iştirak ediblər.
“Qəhrəmanın şəhadəti” adlı kitabda şəhid gizir Ramil Musayevin həyatı və döyüş yolundan bəhs edilir, ailə üzvlərinin, döyüş yoldaşlarının xatirələri yer alır. Mərasimdə iştirakçılar Ramil Musayevin keçdiyi qəhrəmanlıq yolu, həyatı haqqında xatirələrini bölüşüblər.
Ramil Musayev 1991-ci ildə İsmayıllı rayonu Aşağıbaş kəndində anadan olub. R. Musayev Vətən müharibəsində Xüsusi Təyinatlı Dəstənin giziri olaraq, döyüş tapşırıqlarını yerinə yetirib, 3 oktyabr 2020-ci il tarixində Cəbrayıl rayonunun azad olunması istiqamətində gedən döyüşlərdə qəhrəmancasına şəhid olub. Ölümündən sonra “Qarabağ” ordeni, “Vətən uğrunda”, “Füzulinin azad olunmasına görə” və "Cəbrayılın azad olunmasına görə" medalları ilə təltif edilib.
