İsmayıllıda fəaliyyət göstərən qadın fermerlərin müraciətləri əsasında təsərrüfatlara baxış keçirilib. Bu haqda ShimalNews 12 avqust tarixində məlumat verir.
Aqrar Fəaliyyətli Azərbaycan Qadınları (AFAQ) layihəsi çərçivəsində Kənd Təsərrüfatı Nazirliyi “PAŞA Holding”in dəstəyi ilə 9 fermerə dəstək göstərilib. Qadın fermerlərin müraciətləri əsasında təsərrüfatlara baxış keçirilib, qiymətləndirmə sorğuları aparılıb, həmçinin onlara fəaliyyət sahələrinə uyğun təlimlər keçirilib.
Qiymətləndirmədən sonra Topçu kəndində 8 fermerə 6 ədəd yem doğrayan aparat, 1 ədəd süd çəkən aparat və 1 ədəd inkubator təqdim edilib. Kürdmaşı kəndində Solmaz Bağırlının rəhbərlik etdiyi qadın qrupuna məxsus quşçuluq təsarrüfatı üçün isə 96 kv.m-lik hin tikilib, 30 ədəd su qabı və 30 ədəd yem qabı ayrılıb.
Həmçinin “Şəhərdən Kəndə” layihəsi çərçivəsində Sumağallı kəndində “Arzu” qadın qrupuna məxsus təsərrüfat mətbəx, söhbətgah, sanitar qovşağı, uşaq oyun meydançası, lazımi avadanlıqlar ilə təmin edilib.
