Azərbaycanın təbii sərvətlərinin qorunmasına diqqət çəkmək və ekoloji şüuru artırmaq məqsədilə həyata keçirilən “Yaşıl dünya üçün yaşıl bacarıqlar” layihəsi çərçivəsində İsmayıllı gəncləri Şahdağ Milli Parkına maraqlı bir səfər təşkil ediblər.
Shimal.News xəbər verir ki, gənclər parkın zəngin flora və faunası ilə tanış olaraq, burada mövcud olan nadir bitki və heyvan növləri haqqında geniş məlumat əldə ediblər. Eyni zamanda, park ərazisindəki tarixi yerlər gənclərin marağına səbəb olub. Bu təbii və tarixi bilgilər gənclərin ekoloji biliklərini zənginləşdirib.
Səfər çərçivəsində, ekologiyanın gündəlik həyatımızdakı əhəmiyyətini vurğulamaq və bu sahədə məlumatlılığı artırmaq məqsədilə, təlimçi Coşqun İsmayılov tərəfindən interaktiv təlim keçirilib. Təlim zamanı iştirakçılar ekoloji problemlər və onların həlli yolları barədə müzakirələr aparıblar.
Layihənin yekununda iştirakçılara fəal iştiraklarına görə sertifikatlar təqdim edilib.
Layihə, Azərbaycan Gənclər Fondunun maliyyə dəstəyi ilə, İsmayıllı Dövlət Peşə Təhsil Mərkəzi və Gənclərin İnkişaf və Karyera Mərkəzinin Dağlıq Şirvan regional nümayəndəliyinin İsmayıllı bölməsi tərəfindən birgə təşkil olunub.
Bu təşəbbüs həm gənclərin ekoloji maariflənməsinə, həm də ölkəmizin təbii sərvətlərinə dəyər verməyə yönəlmiş mühüm addım kimi qiymətləndirilir.
