Fövqəladə Hallar Nazirliyinin Şimal-Qərb Regional Mərkəzi tərəfindən İsmayıllıda tibb və qeyri-tibb işçiləri üçün təlim keçirilib. Bu haqda ShimalNews 20 aprel tarixində məlumat verir.
“Fövqəladə hadisələrin nəticələrinin aradan qaldırılması zamanı mülki müdafiə qüvvələrinin idarəedilməsinin təşkili” mövzusunda olan tədbir Rayon Mərkəzi Xəstəxanasında təşkil edilib.
Təlim zamanı heyətin fövqəladə hal barədə xəbərdar edilməsi, toplanması, həmçinin işçilərin təhlükəli ərazidən təxliyə edilməsi, şərti qəza yerində kəşfiyyatın təşkili, “xəsarət alanların” qəza zonasından çıxarılması və baş vermiş şərti yanğının söndürülməsi kimi fəaliyyətlər icra edilib.
Tədbirin əsas məqsədi müəssisənin mülki müdafiə hazırlığını yoxlamaq, fövqəladə hadisələr zamanı rəhbər, komandir-rəis heyətinin və tibb işçilərinin nəzəri bilik və praktiki vərdişlərinin təkmilləşdirilməsindən ibarət olub.
