İsmayıllı rayonunda ekoloji yay düşərgəsi keçirilib. Bu haqda ShimalNews 6 avqust tarixində məlumat verir.
"Zubrları təbiətimizə qaytaraq!" adlı növbəti düşərgəyə Qəbələ və İsmayıllı rayonlarından ümumilikdə 30 məktəbli qoşulub. Düşərgənin ilk günündə gənclər zubrların həyat tərzi, ölkəmizdə məskunlaşma tarixi, yayıldığı ərazilər və təbiətdəki rolu, bu nadir canlı növünün təbiətimizə qaytarılması üzrə görülən işlər haqda təqdimatlarda iştirak ediblər. İkinci gündə isə iştirakçıların Şahdağ Milli Parkına ekskursiyası təşkil olunub. Burada məktəblilər Milli Parkın zəngin bioloji müxtəlifliyi ilə tanış olub, zubrların yaşadıqları ərazilərə baxış keçiriblər. Sonda iştirakçılara sertifikatlar və xatirə hədiyyələri təqdim edilib.
Tədbirin əsas məqsədi təbiətimizə qaytarılması nəzərdə tutulan zubrların qorunmasının vacibliyi haqqında gənclərin məlumatlandırılması, ətraf mühitin qorunması sahəsində onlarda xüsusi bilik və bacarıqların, təbiətə qayğıkeş və məsuliyyətli münasibətin formalaşdırılmasıdır.
