2023-cü ildə İsmayıllıda 40 yaşlı Gülsüm Osmanovanın (şərti ad-soyadlı) intiharına görə barəsində cinayət işi açılan Elxan Şıxıyev həbs edilib.
Qafqazinfo.az-ın məlumatına görə, 36 yaşlı E.Şıxıyev Cinayət Məcəlləsinin 125, 157.2 və 221.2.2-ci maddələri (Özünü öldürmə həddinə çatdırma, mənzil toxunulmazlığını pozma, xuliqanlıq) üzrə təqsirli bilinib.
Araşdırmalar zamanı məlum olub ki, Gülsüm və Elxan arasında münasibət 2011-ci ildən yaranıb. Gülsümün azyaşlı övladları Elxanın müəllim işləyən anasının yanına hazırlığa gediblər. Həyat yoldaşının işlə əlaqədar evə aylarla gəlmədiyini bildirən qadınla Elxan arasında həmin vaxt münasibət yaranıb və təxminən 10 ildən artıq davam edib. Amma sonradan onların münasibəti pozulub. Gülsüm evli olan Elxandan ayrılmaq istədiyini deyəndə isə kişi qadını bir neçə dəfə döyüb, onun İsmayıllıda işlədiyi yerə gedərək başqa şəxslərin gözü qarşısında zərbələr endirib. Həmin vaxt Gülsüm küçəyə çıxıb qaçsa da, Elxan onu təqib edərək mindiyi maşından zorla düşürüb və ictimai yerdə yenidən fiziki şiddət göstərib.
Qadın həmin gün baş verən hadisə ilə bağlı İsmayıllı Rayon Polis Şöbəsinə məlumat verib və izahat vermək üçün polis şöbəsinə dəvət edilib.
Lakin Gülsüm ailəli olduğu halda digər şəxslə qeyri-rəsmi münasibətlərinin aşkara çıxmasını istəməyib, yaşadığı İsmayıllı rayonundakı evdə özünü asıb.
Hadisədən sonra Gülsümün yazdığı son məktub da tapılıb:
“Ölüm səbəbim Elxandır, məni təhdid etdiyindən... Başqa heç kim günahkar deyil. Ailəm, məni bağışlayın, üzünüzə daha baxa bilmirəm. İş yerimə gəlib basdı. Sizi çox sevirəm. Əlvida”.
Kağızın arxa hissəsinə isə “Müştərilərim buna şahiddir ki, zorla qolumdan dartıb çıxardı”, - sözləri də qeyd edilib.
İstintaq zamanı, həmçinin məlum olub ki, Elxan Gülsümün intiharından 2 gün sonra gecə saat 23:00 radələrində içkili vəziyyətdə onun yaşadığı evə gedib. Gülsümün ölüm xəbərinə inanmadığı üçün evə girərək onu görmək istəyib. Bu zaman evdə yas mərasiminə yığışmış şəxslər Elxanı tutublar və polisə təhvil veriblər.
Məhkəmədə mərhumun ailəsi Elxanın həbs edilməsini və ağır cəzaya məhkum olunmasını tələb edib. Lakin o, ibtidai və məhkəmə istintaqı müddətində polis nəzarəti altında olmaqla sərbəst buraxılıb.
İsmayıllı Rayon Məhkəməsinin hökmü ilə Elxana 6 il 6 ay həbs cəzası verilib və o, məhkəmə zalındaca həbs olunub.
