İsmayıllı rayonunda iki nəfərin ölümü ilə nəticələnən ağır yol-nəqliyyat hadisəsi ilə bağlı cinayət işi üzrə məhkəmə prosesi başa çatıb.
Oxu.az-ın məlumatına görə, Şəki Ağır Cinayətlər Məhkəməsində keçirilən iclasda Qəbələ rayon sakini Orxan Rəhimliyə hökm oxunub. Məhkəmənin qərarı ilə o, 3 il müddətinə sürücülük hüququndan məhrum edilməklə 6 il azadlıqdan məhrum olunub.
İttihama əsasən, hadisə 2024-cü il dekabrın 22-də gecə saatlarında baş verib. Orxan Rəhimli tələbə yoldaşı Tural Allahverdiyevin dəvəti ilə İsmayıllı rayonuna gəlib. O, spirtli içki qəbul etməyən həmkəndlisi Şükür Şükürlünü ayıq sürücü kimi özü ilə gətirib.
Onlar burada Tural Allahverdiyev ilə yeyib-içiblər. Orxan spirtli içki qəbul etsə də, geri qayıdarkən avtomobili özü idarə etməkdə israr edib. O, dostu Turalı, qohumu Səfəri və ayıq sürücü kimi gətirdiyi Şükürü avtomobilə mindirərək Qəbələ istiqamətində yola düşüb.
Sərxoş vəziyyətdə idarə olunan avtomobil İsmayıllı-Qəbələ yolunun Qurbanəfəndi kəndi ərazisindən keçən hissəsində idarəetmədən çıxaraq aşıb.
Qəza nəticəsində Şükür Şükürlü və Səfər Rəşidov aldıqları xəsarətlərdən hadisə yerində həyatlarını itiriblər. Orxan Rəhimli ağır, Tural Allahverdiyev isə orta-ağır xəsarətlərlə xəstəxanaya yerləşdirilib.
